【低成本一家四口移英· 第一章】

趁移英兩週年及家人抵英一週年，事情終於穩定下來，好好地總結一下及將自己的經驗俾一啲同自己差不多背景的朋友參考。

我諗大部分能夠移民的人，都係一些有資產或至少有點積蓄，如本身喺香港每月掙扎緊月月清，係比較難決定移民，有都係比較少數，而黎生我本人就係只有兩年半簽證、單程機票、$20000港幣就開始咗移民的旅程。

戴定頭盔先，我做得到，唔代表你哋都得，認真嘅因為都真係要頂得住各種壓力，包括屋企人反對（主要係太太）、生活環境、搵工等等，要準備好只有自己一個人面對所有難關。

要一家人（四人一貓）低成本移英，最重要解決兩個任務，第一個任務係要搵唔需要一次過俾12個月租金的屋，咁樣可以大大減低現金流。

第二個任務係搵到一份可以養到家嘅工，唔使多講，工駁工係對無乜積蓄嘅人係最重要。想像只係一次普通嘅搬屋，只係今次搬屋搬半個地球咁遠，只要清晰自己task清單，做哂task就任務完成。

行出第一步嘅決心來自於清楚知道今次機會難得。因為以往要做英國公民，一係你有資本做生意或投資，一係就有專業技能而又符合英國所需，自己知自己事，我既無技術更無資本，所以今次英國開咗條門罅，一定要把握機會。 其次，喺香港都過得唔係太如意，轉過條起跑線其實都係好，事實係喺英國減低咗不少喺香港的開支，過到嚟反而仲儲到錢。

第二篇再同大家分享落地搵地方住，立即搵工賺錢，搵工嘅策略。