【低成本移英．Shareroom 1】

講吓第一間shareroom嘅特別經歷，首先Manchester M9 Moston呢區係基層到最基層嘅地方，我諗普遍嘅香港人都唔會搵到呢區住。

Moston嘅town centre只係一條好短嘅街，非洲人（好似係尼日尼亞）嘅鋪頭居多，巴士站隔離嘅便利店門口長期坐住兩位腳部傷殘嘅街友，每日都會見到佢哋問等車嘅人同出入便利店嘅人攞錢，佢哋同街坊嘅關係係好融洽，街坊有時會俾spare change有啲仲會買支酒俾佢哋，佢哋又會幫返啲街坊喺佢哋入去買嘢時睇住隻狗，佢哋都會撩我吹水問拎spare change，見我戴曼聯頸巾會同我講吓波，我第一期糧出咗每人俾咗£5佢哋。

呢區嘅一星期至少聽到一至兩次警車聲追逐聲，有次朝早收工返屋企仲見到警察執行職務，女警前門敲門，男警後門包抄，拍戲咁樣。

間shareroom係一間4房嘅排屋，原本應該係三房，應該係業主將個廳縮細咗間多咗間房，住咗一個白人一個黑人，其實仲有一個白人，不過佢唔係成日喺度，唯一一次見到佢就係飲醉酒發癲打爆度門，從此就再見佢唔到。

黑人Louis係個大隻佬，日日都會見佢沖蛋白粉飲，加上又係曼聯球迷，間時時廚房撞到煮嘢食都會傾吓波，佢係做舞台setup。

而白人Local Michael就幾乎日日坐喺屋企玩網上poker，一開就開手機同電腦兩枱咁玩。佢好健談，英文清晰易明，同住呢半年佢帶過我入賭場玩，賭場係好chill，唔似澳門嗰種咁博殺，入面有pub可以飲嘢食嘢，賭注細，你落£1 bet都得，嗰晚玩black jack贏£10，去咗M記請食宵夜，第一年聖誕就喺屋企同Michael一齊過，叫pizza 炸雞睇電影，我哋嘅Christmas film係睇 Die Hard。

我間房就係一間single bed room，應該本身係業主個女瞓，所以牆上面仲有小仙女貼紙貼花花燈，所以我間房係充滿童真，記得第一晚住嗰陣係長嘆一口氣，好彩搵到地方住咋…

之前貼過房嘅相，再貼多次先。