首先講吓我呢兩年嘅成果，工作由第一份週薪約£400做倉務嘅agency工，兩年後轉型成技術操作員annual £30000，如連埋OT每月after tax有£3300-3700，仲有員工醫療保險+pension；由第一年得自己一個，到第二年太太加兩個仔加隻貓過埋嚟；由住shareroom到住返正常2房Flat，叫做已經settle down咗。
咁呢兩年究竟做咗啲咩呢？我總結咗有三個階段，第一階段係企穩陣腳階段，第二階段係進取完成任務階段，第三階段，提升生活質素階段。
呢一篇先講第一階段。搵錢方面，因為要繼續俾錢返香港屋企，所以就要迫自己搵到要搵嗰個數。第一年英國收入唔使點樣交稅，因為我7月到埗，當年度嘅免稅額£12570用唔哂，所以落到袋嘅錢比較多，再靠一些可以網上賺referral嘅收入（例如開香港虛擬銀行戶口同topcashback）都有唔錯嘅港幣同英鎊收入幫補，個腦無時無刻都諗點樣用盡每一分一秒創造收入，勉強叫企穩陣腳。
住屋方面，住咗2星期bnb，曼城北面同南面都分別住過，直到8月bnb突然大幅加價，所以臨急臨忙搵咗間Shareroom，喺Manchester北面一個叫Moston嘅地方，£360每月租，一按一上包council tax 水電bill，對於當時要節流嘅自己絕對係good deal。
交通方面每日要1.5小時（單程）搭兩程巴士去南邊工作。
食方面，每日孭住個大背囊，去超市買食材，一個人煮食無咩選擇，通常買mircowave飯盒，漢堡扒，£2.6-2.8有4塊，一次過jin好擺雪櫃，買burger嘅包，去亞超買出前一丁，漢堡扒可以整湯面或burger，仲有pasta，自己煮一餐大概£2 左右，可樂嗰啲可以買廉價品牌，50-60p有2L。
娛樂方面，行公園享受大自然，有時曼聯有U23嘅比賽睇，£1入場費only，約吓香港人一齊打下邊爐咁樣。
總括而言，英國嘅低消費唔代表生活質素會太差，住shareroom亦唔係好似香港咁得間房，只係同其他住戶共用廳、廚房同廁所；1.5小時車程返工，大概係天水圍過將軍澳返工？第一階段就唔太著重生活質素同便利，純粹以收支平衡作優先考慮。
（圖為第一間租住嘅shareroom，應該本身係landlord個女住嘅房間）
Related Posts
