第二階段，開始進取集中做三大任務- 搵養到家嘅全職工、儲錢同埋搵唔使一炮俾12個月租金嘅屋。
搵錢方面，我嘅策略係每月要有£2300-2500 after tax收入，所以搵全職工都係要搵到一份有£2000 after tax月入，如果未搵到，就繼續打兩份agency工，每星期keep住£600 以上after tax月入。所以就算有公司想簽我做全職，但offer唔合乎需要就唔會簽，兩份工係咩概念呢，星期一至五一份長工，星期六有double pay OT，然後星期日再返多一份donut shop嘅part time。
一開始係一星期做足7日，持續咗3個月之後因為份長工間唔時cut更，所以決心轉另一間公司，繼而搵到而家呢一份合乎收入目標嘅工，簽到全職合約就有£28000 annual，返4日然後有6日off，有公司pension同醫保，當時係經agency入去做，要睇表現再決定俾唔俾合約，努力半年後正式簽約，呢半年都仲係繼續打兩份工，keep住£2500-2600 after tax月入。
住屋方面，搬咗落南邊Old Trafford住share room，簽約半年，月租£460，一按一上，包council tax包水包煤氣bill唔包電bill，因為返工喺Trafford park，搬落old Trafford大大減低咗返工路程同時間仲有車費。呢段期間，有舊同事因為搬屋，介紹咗佢個landlord俾我識，唔使經agent，成功以一按一上租到兩房單位，月租£850。
交通方面，只需踩單車踩15分鐘就到公司，單車係買二手£50，當時一個月巴士支出係£66，所以踩一個月左右就回到本。
總結第二階段，一開始要夾硬嚟少少，用精力同時間換錢，慢慢英文進步，更了解職場文化同埋生產經驗，就可以轉做一些技術嘅工作，一來無咁易俾人取代，二來人工會更高，所以如果發現自己份工無助進步英文嘅listening, speaking同writing及日日只係重覆做同樣的工作，無嘢可以增值，不妨轉工，好工is yet to come。
搵屋方面，好多香港人熱門睇嗰啲platform如Rightmove、華人地產代理，無助你搵一按一上嘅屋，你問十個local，十個都會答你一炮俾12個月租係ridiculous，無人會咁俾租，所以睇返一啲local會睇嘅platform搵屋或轉介紹landlord更實際。
（圖為我第一架代步單車）
Related Posts
