【低成本移英．黎生的職業介紹】

呢份工嘅職位係 Operator 操作員，喺一條每日生產平均 60 tons嘅生產線上工作，日常做嘅包括操作機器補充物資、清潔機器、Inspect、更換損耗部件、品質檢測等等。

由於操作機器需要精神高度集中，因為稍有差池會誤傷自己、同事及破壞機器，所以一般我哋返12小時工作，最少會有4個 half hour嘅 pay break。

每個block返兩日早更兩日夜更，然後放6日假，呢6日假期可以選擇返OT，OT平日1.5倍pay，如bank holiday或星期六日OT pay double，所以一般我每個月係返20-22日工。肯OT，呢啲我哋稱為嘅「奴性」，喺英國係優勢，因為喺香港人人都自願OT，而呢度無人肯OT，所以OT會值錢。

本身自己無任何做Engineering嘅經驗，以前喺香港連上口螺絲都係搵我阿爸幫手，所以入行都係由零開始學，一開始由agency工做起，執頭執尾做好一個輔助嘅角色，喺自己識嘅範疇做到最好。一開始有同事嫌我英文唔夠好，因為已經忙緊，而我又聽唔明，佢要重覆講兩三次，當然會燥底，例如要拎工具俾佢，有時我唔係聽唔明英文，而係你就算講中文俾我知，我都唔知係邊件工具… 佢苦笑講咗句，that’s our future…

當然我係尷尬同少許難受嘅，不過當刻要諗嘅係自己嘅價值喺邊，自問組織能力都還可以，作為operator，首要任務就係要維持機器生產，所以要將不同工作排優先次序處理，確保物資充足，機件運作正常，同埋效率高。

公司雖然規模大，但training仲係好old school，似學徒咁，一開始只可以睇舊人點做，所以一有機會我就會搶嚟做，冒住俾人鬧嘅風險都要搶嚟做，因為skill上唔到手，公司係唔會俾合約你，只可以靠自己把握機會，平時做快啲做埋佢哋嗰份，然後叫同事教新嘢，就係咁過咗半年，就拎到份全職合約。

除咗要有基本技術，仲有一半係人事上得到其他同事認同，同事對你嘅觀感都非常重要，今次分享係咁多先。